කාබනික පොහොර භාවිතය

 

රසායනික  පොහොර භාවිතයට වඩා කාබනික පොහොර භාවිතයට යොමුවීම වැදගත්  වන්නේ ඇයි ?

                                   යම්කිසි ශාකයක් විසින් කාලයක් තිස්සේ පසෙහි රැඳුණු පෝෂක කොටස් උරා ගැනීමක් සිදු කරයි.එහිදී මෙම වගාවේ අස්වැන්න නෙළන විට පසෙහි අඩංගු වී තිබූ පෝෂක කොටස් ටිකෙන් ටික ශාකය උරා ගන්නා නිසා පෝෂක ඌනතාවයක් සිදුවෙයි.එම හේතු මත අප පොහොර භාවිතය සිදුකරනු ලබයි. අවම වී  ගිය පෝෂණ කොටස් නැවත ලබාදීම මෙම පොහොර යෙදීම හරහා සිදුකරයි. පොහොර වර්ග දෙකකි. රසායනික පොහොර සහ කාබනික පොහොර ලෙස එම පොහොර වර්ග හඳුන්වා දිය හැකිය. රසායනික පොහොර භාවිතයේදී වැඩිපුරම භාවිතා කරන රසායනික පොහොර ලෙස යූරියා, සුපර් පොස්පේට් ,  m.o.p යන පොහොර වර්ග පෙන්වාදිය හැකිය. එමෙන්ම කාබනික පොහොර වර්ග ලෙස කොම්පෝස්ට් ,කුකුල් පොහොර,  එළු පොහොර, ගොම පොහොර, ශාක අවශේෂ, සත්ව අවශේෂ පෙන්වාදිය හැකිය. එමෙන්ම කාබනික දියර පොහොර ද වර්තමානයේ බොහෝ සෙයින් භාවිතයට ගනී.

 කාබනික පොහොර පොහොරක් වශයෙන් පමණක් නොව  කෘමිනාශකයක්, කෘමි විකර්ශකයක් ,පැළෑටි වර්ධක උත්තේජකයක්  මෙන්ම පාංශු සත්කාරයක් ලෙස ද ක්‍රියාකරයි. කාබනික පොහොර යොදන ලද වගාවකින් බැරලෝහ  හෝ රසායනික ද්‍රව්‍ය අඩංගු නොවූ අස්වැන්නක් නෙළා ගත හැකි වේ. සෞඛ්‍ය සම්පන්න ජීවිතයකට වස  විසෙන් තොර අස්වැන්නක් ලබා ලබාගත හැකිය.

ශාකයක වර්ධනයට අත්‍යවශ්‍ය පෝෂක ද්‍රව්‍ය ලෙස පෝෂක දාහතක් පමණ අවශ්‍ය වේ.නමුත් රසායනික පොහොර මගින් ශාකයක  පෝෂණය වෙනුවෙන් ලබා දෙන්නේ ප්‍රධාන පෝෂක වර්ග තුනක් පමණි.ඒ නයිට්‍රජන් ,පොස්පරස් සහ පොටෑසියම් යන පෝෂක ද්‍රව්‍යයි. කාබනික පොහොර භාවිතය මගින් මෙම පෝෂක වර්ග සමතුලිතව වගාවට ලබා දීම සිදුකරන නිසාම වගාවේදී, කාබනික පොහොර ඉතාමත් වැදගත් බව පෙන්වා දිය හැකිය .කාබනික පොහොර භාවිතයේ ඇති තවත් සුවිශේෂි  වැදගත්කමක් ලෙස කැටායන හුවමාරු ධාරිතාව ඉහළ අගයක පවත්වා ගනිමින් පසේ පෝෂක ගුණයන් සුලබ කිරීම සඳහා දායකත්වය ලබා දෙයි. කැටායන හුවමාරු ධාරිතාව හෙවත්  CEC යනු පසෙහි පෝෂක සංයුතිය සඳහා බලපාන ප්‍රධාන රසායනික ලක්ෂණයක් වේ.

ඒකාබද්ධ පැලෑටි පෝෂක මූලධර්මයන්ට  අනුව කාබනික පොහොර භාවිතය මගින් රසායනික පොහොරවල කාර්යක්ෂමතාවය ඉතාමත් වැඩි මට්ටමකට ගෙන එයි. එම නිසා රසායනික පොහොර භාවිතා කරන විට කාබනික පොහොර යෙදීම ද යෝග්‍ය වේ.එහි සරල අදහස නම් කාබනික පොහොර මගින්  රසායනික පොහොර වල අඩංගු වන සංඝටක ඇද බැඳ තබාගෙන ශාකයට ලබා දීම සිදු කරයි.

එමෙන්ම කොම්පෝස්ට් පොහොර නිෂ්පාදනය කරන විට ශාක අවශේෂ වෙනත් සත්ව අපද්‍රව්‍ය සහ වල් පැලෑටි නිසියාකාරව  කළමනාකරණය කරනු ලබයි. එහිදී පළිබෝධ හානි වෙනත් රෝග ආදිය මගින් වගාවට සිදුවන හානිය අවම වේ. කොම්පෝස්ට් නිෂ්පාදනයේ දී එම අපද්‍රව්‍ය ඉහළ උෂ්ණත්වයකට ලක් කරනු ලබයි. එම ක්‍රියාවලිය තුළ දී වල් පැල නැවත බෝවිය හැකි ශාකවල බීජ විනාශ වීමත්, රෝගකාරක විනාශ වීමත් සිදු වේ.කාබනික  පොහොර නිෂ්පාදනයට භාවිත කෙරෙන අපද්‍රව්‍ය, ගෘහස්ථ කැලිකසල දිරන සුලු කළමනාකරණය සිදු වන නිසා පරිසරය පිරිසිදුව අලංකාරව පවත්වා ගත හැකි වේ.

වගාව සඳහා සමබර පෝෂණයක් ලබාදීමට කාබනික පොහොරවලට හැකියාවක් පවතී.රසායනික පොහොර මගින් භූගත ජලයට බැර ලෝහ එකතු වීම සිදුවේ.නමුත් කාබනික පොහොර මගින් භූගත ජලය ආරක්ෂා කිරීම සිදු වේ. එම නිසා රසායනික  පොහොර භාවිතයට වඩා කාබනික පොහොර භාවිතයට යොමුවීම වැදගත් කරුණකි.

පසේ  වර්ධනය වන ශාක වලට එම පසේ ජලය රඳවා තබා ගැනීමේ ධාරිතාව යන ලක්ෂණය අනිවාර්යෙන්ම වැදගත් වේ. මෙම කාබනික පොහොර මඟින් පසෙහි වයනය දියුණු කරයි. එමගින් පසෙහි ජලය රඳවා තබා ගැනීමේ හැකියාව ඉහළ යන නිසාම කාබනික පොහොර භාවිතය වැඩි අස්වැන්නක් ලබාදෙයි.කුඩා පැළ වලට නිසියාකාරව ජලය රඳවා තබා ගැනීම ඉතාමත් යෝග්‍ය වේ .එමෙන්ම පසට කාබනික පොහොර යොදන විට පස් අංශු විසිරි යාමට ඉඩ නොදෙයි. පසෙහි ස්ථායීතාවය කෙරෙහි මේ කාබනික පොහොර වැදගත් මෙහෙයක් ඉටු කරනු ලබයි.

පසක ස්ථායිතාවයට පාංශු ජීවීන් විසින් නිකුත් කරන රසායනික ශ්‍රාවයන් හේතුවක් වන බව සොයා ගෙන තිබේ. ඒ  මහනුවර ජාතික මූලික අධ්‍යයන ආයතනයේ විද්‍යාඥයන්ගේ සොයාගැනීම් වලට අනුවයි.  පාංශු ජීවීන් ජීවත් වන පසක ස්ථායීතාවය ඉතාමත් ඉහළ මට්ටමක පවතී. එබැවින් පාංශු ජීවීන් රැක ගැනීමට රසායනික පොහොර භාවිතයට වඩා කාබනික පොහොර භාවිතය සිදුකළ යුතුය. උදාහරණ වශයෙන් ගැඩවිල්ලන් වැනි හිතකර පාංශු ජීවීන්ගේ වාසයට කාබනික පොහොර භාවිතය වැදගත් වේ.

මෙහිදී  සඳහන් කළ  කරුණු අනුව පෙනී යන්නේ රසායනික පොහොර භාවිතයකට වඩා කාබනික පොහොර භාවිතය වගාවේ දී වාසි ගෙනදෙන බවයි.

nature💚

 

flowers

 

ආර්ථික අර්බුදය හමුවේ ජන ජීවිතය

 

ආර්ථික අර්බුදය හමුවේ ජන ජීවිතය

                      ශ්‍රී ලංකාව වනාහි ලොව පුරා සංචාරක ආකර්ෂණය දිනාගත් අතිසුන්දර රටක් ලෙස හැදින්වීම සුදුසු වේ. ස්වභාවසෞන්දර්යයේ මනරම් භාවය නිසා ම අන්‍ය රටවල් අතරින් ඉහළ ස්ථානයක රැඳී සිටීමට ශ්‍රී ලංකාවට හැකියාව ලැබී ඇත. මිලියන 22.1 ජනගහනයකින් සමන්විත රටක් වූ ශ්‍රී ලංකාව 2021 වර්ෂය වන විට සියයට 3.3 ක ආර්ථික වර්ධනයක් පෙන්නුම් කරන ලද රටකි.නමුත් 2022 වසර වනවිට ශ්‍රී ලාංකීය ආර්ථිකය යම්කිසි කඩාවැටීමකට ලක් වී ඇති බව ලොකු කුඩා කාටත් අවබෝධ කොට ගත හැකි කරුණකි. කාලයක් තිස්සේ පැවති ව්‍යූහමය දුර්වලතා සහ කොවිඩ් වසංගත තත්ත්වය බව ඊට හේතු වූ බව රජය අවධාරණය කරයි.ශක්තිමත් ආර්ථිකයක් යනු රටක කොඳුනාරටිය වේ.රටක ඉදිරි පැවැත්ම තීරණය කරන්නේ එම රටේ ශක්තිමත් ආර්ථිකය විසිනි .ආර්ථික අර්බුදයක් ඕනෑම අවස්ථාවක ඇතිවිය හැක.මේ ආර්ථීක අර්බුද කාලයක් තිස්සේ නොදැනුවත්ව සෙමින් සෙමින් වර්ධනය වී ආවකි.හාවර්ඩ් විශ්ව විද්‍යාලයේ මහාචාර්ය Ricardo hausemann සඳහන් කරන්නේ ආර්ථික අර්බුද පැමිණෙන්නේ සෙමින් සහ එකපාරටම බවයි. slowly and suddenly.ශ්‍රී ලංකාව ද මේ මොහොත වන විට විශාල ආර්ථික අර්බුදයකට මැදි වී සිටින රටක් වේ. ආර්ථික අර්බුදයක් මතු වීම ප්‍රධාන කොටස් පහක් යටතේ සිදුවිය හැකිය .ඒ ඩොලර් නැති වීමේ අර්බුදය, ණය අර්බුදය ,මූල්‍ය පද්ධතියට සිදුවන බලපෑම්, දේශපාලන අර්බුදය සහ මානුෂීය  අර්බුදය වශයෙනි.

ඩොලර් නැති වීමේ අර්බුදය නිසාම විදුලිය ,ඛනිජ තෙල් සහ අනෙකුත් අත්‍යවශ්‍ය ද්‍රව්‍ය නොමැතිව වීම මත අ්‍යවශ්‍ය සේවා බිඳවැටීම සාමාන්‍යයෙන් සිදුවන දෙයකි.එම නිසාම ඛනිජතෙල් ,විදුලිය මූලික කර කරගෙන ක්‍රියාත්මක වූ බොහෝ ආයතන සහ එමගින් සේවා ලබන ආයතන ක්‍රියාත්මක කරගෙන  යාමේ ගැටලු ඇති වේ.එමෙන්ම ණය අර්බුදය ද මේ සමගම ඊළඟට පැමිණෙන අදියර වේ. ජූලි මස වන විට ඇමරිකානු ඩොලර් බිලියනයක් පමණ බැඳුම්කරයක් ගෙවීමට සිදුවීම සහ එහි පොලී ගෙවීමට තිබීම මත ශ්‍රී ලංකාව ණය අර්බුදයකට මුහුණ පා සිටී. එමෙන්ම එම බැඳුම්කර සහ පොලී මුදල් ගෙවා ගැනීමට නොහැකි වුවහොත් ගෙවීම් පැහැර හැරීම් මත තවත් අර්බුද කරා ගමන් කිරීමට සිදුවනු ඇත.මෙහි තුන්වන අදියර වශයෙන් මූල්‍ය පද්ධතියට බලපෑම් සිදුවේ. රජයට විශාල වශයෙන් ඩොලර් එකතු කර ගැනීමේ මෙහෙයුමක් දියත් කිරීමට සිදුවේ.එමෙන්ම ලංකාවේ ස්වෛරී බැඳුම්කර බැංකු පද්ධතිය මගින් මිලදී ගෙන තිබීම නිසා මූල්‍ය පද්ධතියට මෙම බලපෑම් එල්ල වෙයි.ණය ප්‍රතිව්‍යූහගතකරණය කළ යුතු නිසා එහි බලපෑම් බැංකු පද්ධතියට අනිවාර්යෙන්ම එල්ල වේ.හතරවන අදියර වශයෙන් දේශපාලන අර්බුදය පෙන්වාදිය හැකිය. ජනතාවට බොහෝ අප බොහෝ අපහසුතාවලට ලක් වීම මත සිය අප්‍රසාදය දේශපාලන බලාධිකාරිය වෙත එල්ල කිරීම මෙහිදී සිදුවේ. එහිදී උද්ඝෝෂණ, අරගල වැනි දේ දිගින් දිගටම සිදු විය හැකිය. එමෙන්ම ආණ්ඩුව සහ සෙසු පක්ෂ අතර නිරන්තර හැලහැප්පිලි සිදුවීම මේ තත්ත්වය තුළ ඇතිවිය හැකි ක්‍රියාවලියකි.එමෙන්ම ඊළඟ අදියර ලෙස මානුෂීය අර්බුදය පෙන්වාදිය හැකිය. මෙම තත්ත්වය උග්‍ර වීම මත මානුෂීය අර්බුදයක් කරා මෙම ආර්ථික අර්බුදය ළඟා වීමේ වැඩි අවදානමක් පවතී. අත්‍යවශ්‍ය ආහාර ද්‍රව්‍ය ,අත්‍යවශ්‍ය ඖෂධ වර්ග හිඟ වීම වීම මත ජීවිත පවා අවදානමකට ලක් වේ .එහිදී මානුෂීය අර්බුදයක් නිර්මාණය වේ.අර්බුදයක් ඇති වන විට මෙම කොටස් පහ පිළිවෙළට සිදු වීම අනිවාර්ය නොවේ. ශ්‍රී ලංකාවේ වර්තමාන  ආර්ථික අර්බුදයේ ඩොලර් ප්‍රශ්නය නිසා ජනතාවට සහ ආයතනවලට බොහෝ ගැටලු රාශියකට මුහුණ දීමට සිදුවිය. එහිදී එම පීඩනය ජනතාව දේශපාලන බලාධිකාරිය වෙත එල්ල කිරීම හෙවත් දේශපාලන අර්බුදයක් නිර්මාණය වීම දෙවන අදියරයේ දී දක්නට ලැබුණි. මේ ආකාරයට මෙම අර්බුදයේ අදියර  ඕනෑම අවස්ථාවක් තුළ ඇතිවීමේ හැකි හැකියාවක් පවතී

දැන් අප අවතීර්ණ වී සිටින්නේ මෙම අර්බුදයේ අධි උද්ධමනකාරී කාලවකවානුවක් වෙතයි.මේ තත්ත්වය තුළ වියදම වැඩිවීම සහ ආදායම් අඩු වීම වැදගත් ලක්ෂණයකි. එමෙන්ම භාණ්ඩ හිඟකම සහ තිබෙන භාණ්ඩ මිළ අධික ලෙස ඉහළ යාමේ තත්ත්වය හඳුනා ගත හැකිය. සාමාන්‍ය ජනතාව වෙත වියදම් කළමනාකරණය කිරීමේ ගැටලු  පීඩන ගෙනදෙමින් එල්ල වේ. එහිදී බොහෝ පුද්ගලයන් මානසිකව කලකිරීමේ ස්වභාවයකට පත් වීමේ ඉඩකඩ පවතී.මෙයට හේතු වශයෙන් නිසි ආර්ථික ප්‍රතිසංස්කරණ  හඳුනා නොගැනීම, කලට වේලාවට ඒවා ක්‍රියාත්මක නො නොකිරීම හේතු විය.අර්බුදය ඇතිවීමට බලපාන ලද හේතු සහ ඇති වූ  අර්බුදය  වළක්වා ගැනීමට ගත යුතු ක්‍රියාමාර්ග පිළිබඳව දැඩි අවධානය යොමු කළ යුතු කාලයක් දැන් උදාවී තිබේ.ඒ වෙනුවෙන් ආර්ථික විශේෂඥයන් මෙන්ම සාමාන්‍ය ජනතාවද සතුව ද  විශාල වගකීමක් පැවරී තිබේ.

ආර්ථික අර්බුදයත් සමඟ ජනතාවට ජන ජීවිතයට එල්ල වූ තර්ජන පිළිබඳව අවධානය යොමු කරන විට ජන ජීවිතය බොහෝ සෙයින් කඩා වැටීමකට වැටීමකට ලක් වී තිබේ. 1948 නිදහසින් පසු ශ්‍රී ලංකාව මුහුණ දෙන දැවැන්තම ආර්ථික අර්බුදය මෙයයි.ණය ගැනීම් මත දෑස් දල්වා බලාපොරොත්තු තබා ගත් ශ්‍රී ලංකාවේ ආර්ථිකය ණය බර වැඩිවීම කල්තියා හඳුනා ගන්නට අපොහොසත් වීම කණගාටුවට කරුණකි. ඒ තත්ත්වය නිසා අද ජනතාවට අධික බදු බරක් පැටවෙමින් පවතී. ජනතාව මේ අර්බුදය හරියාකාරව මේ මොහොතේ අවබෝධ කරගත යුතු වේ.ඒ වෙනුවෙන් ආකල්පමය වෙනසක් ඇති කර ගැනීම මූලික වශයෙන් කළ යුත්තකි.එමෙන්ම රජය මේ මොහොතේ ඉතා ඉක්මනින් ආර්ථික ප්‍රතිසංස්කරණ කරා යොමුවීම වැදගත් වේ.අර්බුදයක් සෑම විටම ඉක්මන් තීරණ ඉල්ලා සිටී. එමෙන්ම තීරණ ගැනීම් සහ ක්‍රියාත්මක කිරීම වේගවත් විය යුතුයි. නිවැරදි විය යුතුයි.ජාත්‍යන්තර මූල්‍ය අරමුදල  සහ මිත්‍රපාක්ෂික රටවල් සමඟ සාකච්ඡා කරමින් ආර්ථික අභියෝග ජය ගැනීමට සුදුසුම ක්‍රම භාවිතා කළ යුතුයි.  එම සාකච්ඡා සාර්ථක වුවහොත් රටක් වශයෙන් ආනයන වියදම හා අපනයන ආදායම අතර පවතින පරතරය පියවා ගැනීමට හැකිවනු ඇත.එමගින් යම්තාක් දුරකට අර්බුදය විසඳා ගැනීමේ  හැකියාවක් පවතී.

සාමාන්‍ය ජනතාව වෙනදාට වඩා තම ජීවන වියදම් අවම කරගෙන රජයට යම්කිසි ආකාරයක සහනයක් ලබා දීමට කටයුතු කළ යුතුය. ඛනිජ තෙල් හිඟවීම මත ප්‍රවාහන ගැටලු මේ අවස්ථාවේ ඇති වේ. එහිදී අප සිදුකළ යුතු වන්නේ පොදු ප්‍රවාහන සේවය වෙත යොමුවීමයි. කෙටි දුර ගමන් බිමන් යාම සඳහා බයිසිකල් භාවිත කිරීමට පුරුදු විය යුතුය .එය ශරීර සෞඛ්‍යයට ද හිතකර වේ. එමෙන්ම මේ මොහොත වන විට විදුලි විදුලි බිල දෙගුණ තෙගුණ වෙමින් පවතී. එම නිසාම නිවසේ විදුලි බිල අවම කර ගැනීම සඳහා කටයුතු කළ යුතුය. වායුසමීකරණ භාවිතය අඩු කිරීම, අනවශ්‍ය විදුලි පහන් නිවා දැමීම, විදුලිය අවම වශයෙන් වැයවන විදුලි බල්බ වෙත යොමුවීම, අවශ්‍ය ඇඳුම් එකවර මැද ගැනීම් ආදිය ඒ වෙනුවෙන් සිදුකළ හැකිය. තවද අපගේ ආහාර පරිභෝජන රටාව වෙනස් කළ යුතු කාලයයි. නිවසේ පිසින ලද ආහාර භාවිතයට යොමු වීම වැදගත්වේ .වෙළඳසැලෙන් මිලදී ගන්නා ආහාර ඉතා අධික මිල ගණන් යටතේ මේ වන විට අලෙවි වේ. එම නිසා වියදම් අවම කර ගැනීම සඳහා මෙම ක්‍රියාමාර්ග අනුගමනය කිරීම ඉතාමත් වැදගත් වේ. එමෙන්ම අමතර ආදායම් මාර්ගයක් වෙත යොමුවීම මේ මොහොතේ ඉතාමත් සුදුසුම විකල්පයකි. කෘෂිකර්මාන්තය ,සත්ව පාලනය ,අත්කම් නිර්මාණ, අන්තර්ජාල ව්‍යාපාර වෙත යොමු වීමේ හැකියාවක් ඔබට පවතී .ධනාත්මකව සිතීම මත බොහෝ ව්‍යාපාර අවස්ථා උදාකර ගත හැකිය.

ආර්ථික අර්බුදයක් හමුවේ ජන ජීවිතය ගැටලුවලින් තොරව පවත්වාගෙන යාම සඳහා  මෙකී කරුණු ඉතාමත් වැදගත් වේ.

memories

 

memories

 

නයි මිරිස් වගාව

 

ස්කොච්  බොනට් හෙවත් නයි මිරිස්

  අතීතයේදී කොච්චි, යකා මිරිස්, පෙට්ටි මිරිස් ලෙස හඳුන්වන ලද නයි මිරිස් වසර පුරාම මල් පිපෙන එමෙන්ම වසරකට වඩා වැඩි කාලයක් ක්ෂේත්‍රය තුළ පවත්වාගෙන යා හැකි බෝගයකි.   ගෘහාශ්‍රිත සුළු පරිමාණයෙන් වගා කළ හැකි බෝගයක් නිසාම කාබනික වගාවක් ලෙසද පෙන්වා දිය හැකිය. එමෙන්ම වර්තමානය වන විට දිවයිනේ බොහෝ ප්‍රදේශවල සාර්ථක ලෙස වගා කළ හැකි නයි මිරිස් මහා පරිමාණව ද වගා කරනු ලබයි. නයි මිරිස් ප්‍රභේදයක් වන ස්කොච් බොනට්  වර්තමානයේ විශාල වශයෙන් ලාබ ගෙනදෙන  ව්‍යාපාරයක් බවට පත් වී තිබේ.

 වසරකට වඩා වැඩි කාලයක් ආර්ථික ලාභ ලැබිය හැකි නයි මිරිස් වගාව සිදු කරන ආකාරය පිළිබඳව හඳුනාගනිමු. පළමුව වෙළඳ පොළේ හොඳ ඉල්ලුමක් පවතින බීජ වර්ග තෝරා ගැනීම වැදගත් වේ.සරුවට වැඩුණු නයි මිරිස් ගසක කරල් වලින් බීජ ලබාගත හැකිය .හොඳින් ඉදුණු පසු එයින් ඉවත් කර ගන්නා බීජ දින දෙකක් තුනක් අතර කාලයක් තුළදී  තවාන් කිරීම ද වැදගත් වේ. තවාන් දැමීමට වඩා වෙළෙඳ පොළෙන් මිලට ගත් හැකි වගා තැටි සුදුසුම වගා ක්‍රමයක් වෙයි. ජීවානුහරණය කරන ලද වගා මාධ්‍ය මෙම තැටි තුලට දමාගෙන එක වළක් තුළ එක් පැලයක් ලබාගත හැකි ලෙස බීජ තැන්පත් කිරීම් සිදු කළ හැකියි.මේ ආකාරයෙන්  බීජ තැන්පත් කිරීමෙන් පසු එම තැටිය මතට අළු ඉසීම මගින් කෘමි උවදුරු, දිලීර රෝග අවම කරගත් හැකිය. වැසි දිය නොවැටෙන ලෙස සාමාන්‍ය හිරු එළිය යටතේ මේ බීජ තුළින් පැළ ලබාගත හැක. ඒ සඳහා සති දෙකක කාලයක් ගතවේ. වර්තමානයේ නයි මිරිස් වගාව වෙනුවෙන් පොහොර වර්ග, බීජ, පැළ මෙන්ම සියලු වගා උපදෙස් ලබා දෙන ආයතන පවා නිර්මාණය වී තිබේ. එවැනි ආයතනයක් සමඟ සම්බන්ධ වීමේ හැකියාව ද පවතී. මේ සඳහා සාර්ථක මාධ්‍ය ලෙස හඳුනාගෙන ඇත්තේ වගා මළු වෙයි. නමුත් මෙය වගා මළු නොමැතිවද වගාකළ හැකි බෝගයකි. ඒ සඳහා ඉතා හොඳින් වතුර බැස යන මනා කාණු පද්ධතියකින් යුතු බිමක් සකස් කරගැනීම අවශ්‍ය කරුණක් වේ. වගා තැටි තුළ තැන්පත් කරගත් බීජ පැළ බවට පත්වූ පසු වගා මළු හෝ සකස් කරගන්නා ලද බිමෙහි රෝපණය කළ යුතුය.

ඝන අඩි එකක ප්‍රමාණය සහිත වලක් මෙම පැළ සිටුවා ගැනීම සඳහා වැදගත් වේ. එමෙන්ම පැළ අතර දුර අඩි දෙකක් වීම ප්‍රමාණවත් වේ . සෙවන සහිත බිම් කඩක් නයි මිරිස් වගාවට සුදුසු ම බිමකි. වගා කිරීමට ප්‍රථම කොම්පෝස්ට්, කුකුල් පොහොර, දිරාගිය ගොම ආදිය යෙදිය හැකිය. එ මෙන්ම රසායනික පොහොරද මේ සඳහා භාවිතා කළ හැකිය. මහා පරිමාණ වගාවකදී නම් රසායනික පොහොර භාවිතය අත්‍යවශ්‍ය කරුණකි. දියර පොහොර සහ කෘමි විකර්ශක ද යොදා ගැනීම මගින් සාර්ථක වගාවක් ලබාගත හැකිය . මෙලෙස සිටුවා ගත් වගාවක මාස තුනක සිට අස්වනු නෙලීම ආරම්භ වෙයි. මාස 3 සිට අවුරුද්දකට වඩා වැඩි කාලයක් දක්වා මනා නඩත්තුවකින් යුතුව අස්වනු නෙලිය හැකිය.අස්වනු අඩු වන කාලය වන විට කප්පාදු කිරීම ඉතාමත් වැදගත් වේ.  කප්පාදුව මඟින් ශාක නැවත වර්ධනය කරගැනීම මගින් අස්වැන්න වැඩි කරගැනීමට හැකියාව ලැබේ

 මේ නයි මිරිස් වගාවට සිදුවන ප්‍රධානතම වගා හානි පිළිබඳව අවධානය යොමු කරන විට කොළ කොඩවීම හඳුනාගන්න පුළුවනි. කොල කොඩවීම ඇතිවන්නේ කෘමිහානියක ප්‍රතිඵලයක් වශයෙනි. සත්ව සංකීර්ණයක හානි නිසා කොළ කොඩ වීම සිදුවේ.තවානේ සිට අස්වැන්න නෙළන අවස්ථාව දක්වාම විවිධ අවධීන් තුළ කොළ කොඩවීම දැකගත හැකිය .පැල මැක්කන්,  මයිටාවන්, කූඩිත්තන් සහ සුදු මැස්සා යන සතුන් මගින් ව්‍යාප්ත වන වෛරස් රෝග නිසා කොළ කොඩ වීම සිදුවේ.මේ සතුන් අතරින් පැළ මැක්කාගේ හානිය ප්‍රධාන වශයෙන් සිදුවන හානියයි.වර්ෂා කාලයට වඩා වියලි කාලය තුළ මේ රෝග ව්‍යාප්තිය අධිකව සිදු වේ.ඊට හේතුව වන්නේ වියලි කාලයේ තුළ මෙම සතුන් සිය ජීවන චක්‍රය සම්පූර්ණ කිරීමයි.ශාක පත්‍රයේ  උඩු පැත්ත සහ යටි පැත්ත තුළ රැඳෙමින් මෙම සතුන් ශාක පත්‍රයේ යුෂ උරා බොයි.එමඟින් නයි මිරිස් වගාව තුළ මෙම රෝග ඇතිවේ. ඒවා වළක්වා ගැනීමට කාබනික මෙන්ම රසායනික පොහොර භාවිත කිරීම අත්‍යවශ්‍ය වේ. 

සුළු ඉඩ කඩක වුව ද වගා කළ හැකි නිසාම නයි මිරිස්මිරිස් වගාව මේ ආර්ථික අර්බුදයකට මුහුණ දෙන උද්ධමනකාරී කාලවකවානුව තුළ ඔබටත් අමතර ආදායමක් ලබාගැනීම සඳහා සිදු කළ හැකි වටිනා වගාවක් ලෙස පෙන්වා දිය හැකියි

වකුගඩු රෝගය පිළිබද ඔබ දැනුම්වත් ද?

 

 වකුගඩු රෝගය පිළිබද ඔබ දැනුම්වත් ද?    

 මිනිස් ශරීරය තුළ වකුගඩු යුගලයක් පිහිටා තිබේ .ශරීරයේ පවතින අත්‍යවශ්‍ය නියාමන ඉන්ද්‍රියක් වන මෙහි බෝංචි බීජ හැඩයෙන් හඳුනාගත හැකි ය. ඉල ඇට පෙළට යටින් එමෙන්ම කොදු ඇට පේලිය  දෙපසින් වකුගඩු යුගලය පිහිටා තිබේ. වකුගඩු අපේ ශරීරයේ ප්‍රධාන බහිස්ශ්‍රාවී ඉන්ද්‍රිය වශයෙන් ක්‍රියාත්මක වේ. අනවශ්‍ය තරල සහ අපද්‍රව්‍ය ඉවත් කිරීම මෙමගින් සිදුවේ.

     මෙම ක්‍රියාවලිය සිදු කරනු ලබන වකුගඩු නරක් වීම ලෙසින් හැඳින්වෙන්නේ වකුගඩුවල ක්‍රියාකාරීත්වය දුර්වල වීමයි. එම තත්ත්වයට හේතු සාධක ගණනාවක් බලපෑ හැකි ය. අධික රුධිර පීඩනය, දියවැඩියාව,, ආඝාතය ස්ථූලතාවය යන රෝග නිසාම වකුගඩු නරක් වීම සිදුවිය හැකි බව වෛද්‍ය මතය වේ.  ශරීර අභ්‍යන්තරයේ පවතින රෝගී තත්වයේ බරපතලකම මත රෝග ලක්ෂණ එක් එක් පුද්ගලයන් තුළ වෙනස් ආකාර වලින් පෙන්නුම් කරයි.  රෝග ලක්ෂණ අනුව රෝගය මුල් අවස්ථාවේදීම හඳුනා ගැනීමට බොහෝ රෝගීන්ට නොහැකි වනු ඇත. වකුගඩු රෝගය පොදු ලක්ෂණයක් වශයෙන් පාදයේ, මුහුණේ මෙන්ම උදරයේ ඉදිමුම් ගතිය ඇතිවීම සිදුවේ. උදය වරුවේ මේ තත්ත්වය බොහෝවිට දැකගත හැකි ය. අධි රුධිර පීඩනය වකුගඩු අකර්මණ්‍ය වූ පුද්ගලයන් තුළ දක්නට ලැබෙන තවත් ලක්ෂණයකි.

     එමෙන්ම ආහාර අරුචිය, වමනය, ඔක්කාරය ද මේ රෝගීන් තුළ දක්නට ලැබෙන රෝග ලක්ෂණයන් වේ. මුඛයේ අසාමාන්‍ය රසක් දැනීම, ආහාර අඩුවෙන් ගැනීම වකුගඩු දුර්වල වන රෝගීන් තුළ දක්නට ලැබේ. බොහෝ සෙයින් වකුගඩු අක්‍රිය වී ඇත්නම් විෂ ද්‍රව්‍ය මට්ටම වැඩි වූ විට ඔක්කාරය, ඉක්කාව, වමනය ඇති විය හැකි ය. ශරීරය දුර්වල වීම සිදු වේ. වැඩක යෙදෙන විට ඉතා ඉක්මනින් විඩා දැනේ. මුල් අවධියේ මේ ලක්ෂණය දක්නට හැකි ය. පිටකොන්ද ඉතා වේදනා ගෙන දෙයි. කකුල් වල කෙන්ඩා පෙරළීම වැනි වේදනා ද මේ වකුගඩු අක්‍රිය වීමේදී ඇතිවන අපහසුතා වෙයි. තවද මුත්‍රා දැවිල්ල නිතර මුත්‍රා යාම ඒ වගේම මුත්‍රා සමඟ ලේ හෝ සැරව පිටවීම සිදුවිය හැකි ය. මුත්‍රා වහනය බාධා වන විට මුත්‍රා  සෙමින් පිටවීම හෝ වඩා තදබල තත්ත්වයක් ඇති වන විට මුත්‍රා පහ කිරීම සම්පූර්ණයෙන්ම සිදුකර නොහැකි තත්ත්වයට පත් වේ.  මෙම රෝගය වළක්වා ගැනීම වෙනුවෙන් 2006 වර්ෂයේ  සිට අඛණ්ඩව වර්ෂයක් පාසාම ලෝක වකුගඩු දිනයක් නම් කර ඒ හා සමගාමීව වැඩසටහන් රැසක් සංවිධානය කරයි.

    බාල ,තරුණ ,මහලු භේදයකින් තොරව ඇතිවිය හැකි රෝගී තත්ත්වයක් වන මෙය නිහඬ මාරයකු වශයෙන්  වෛද්‍යවරු පෙන්වා දෙති. තරුණ අවධිය තුළ තදබල ලෙස රුධිර පීඩනය පවතීනම් වහාම වෛද්‍යවරයෙකු හමු වීම සුදුසු වේ. වකුගඩු යුගලයම අකර්මණ්‍ය වීම  සිදු වූ විට අවසානයේ දී වකුගඩු බද්ධ කිරීමකට හෝ රුධිර කාන්දුකරණ කිරීමට සිදුවේ. වකුගඩු බද්ධය සංවර්ධනය වන රටවල සිදු වන්නේ 5% -10% අතර අල්ප ප්‍රමාණයකිනි. ඒ නැතිනම් අවාසනාවන්ත ලෙස මරණය උරුම වෙයි. වකුගඩු රෝගය නිට්ටාවට සුව කිරීමට ප්‍රතිකාරයක් නොමැති නිසාම එකම විකල්පය ලෙස සඳහන් කිරීමට හැකිවන්නේ රෝගය කල්තියා හඳුනා ගැනීම සහ ඉන් වැළකීම පමණමයි. රෝගී තත්ත්වයන් නොසලකා සිටීම ඔබ මරණයට ඉතා ඉක්මනින් ළඟා වන ක්‍රියාවකි.  වකුගඩු දුර්වල වූ පුද්ගලයන්ට එනම් වකුගඩු රෝගීන්ට ද මේ රෝගය පාලනය කරගත හැකි ය. එමෙන්ම ප්‍රවේශම් වීම තුළින් නිරෝගී පුද්ගලයන්ට ද වකුගඩු අවදානමෙන් මිදීමේ හැකියාව පවතී. ශරීරය නිරෝගීව පවත්වා ගැනීම ,බර නියමිත මට්ටමක පවත්වා ගැනීම ,දුම්පානය අතහැරීම, සෞඛ්‍යවත් ආහාර රටාවකට යොමුවීම ,නිරන්තර වේදනා නාශක භාවිතයෙන් තොර වීම, වසරකට වරක් වකුගඩු පරීක්ෂා කරවා ගැනීම මෙන්ම ජලය වැඩියෙන් පානය කිරීම මගින් වකුගඩු නිරෝගීව තබා ගත හැකි වේ. රෝගය මුල් අවදියේ ම හඳුනා ගැනීම තුළින් ජීවිත අවදානම අඩුවේ. නමුත් අවාසනාවට කරුණ වන්නේ බොහෝ පිරිස් මෙම රෝගී තත්ත්වය නොසලකා හැරීම සහ ඒ පිළිබඳ නියමිත දැනුම්වත් භාවයකින් තොර වීමයි.

      මෙවර වකුගඩු දින තේමාව වන වඩාත් හොඳ වකුගඩු සත්කාරයක් සඳහා දැනුම පරතරය අඩු කරගනිමු යන තේමාවට අනුව දැනුම්වත්භාවය පෘථුල කර ගැනීම මත මෙම භයානක රෝගී වැළකී සිටීමේ හැකියාව පවතී. වකුගඩු රෝගය පිළිබඳ මූලික සෞඛ්‍යමය කරුණු පිළිබඳ මහජනතාව දැනුම වර්ධනය කිරීම මෙම ගෝලීය ව්‍යාපාරය තුළින් අරමුණු කෙරේ . උතුරුමැද පළාතේ මූලික වශයෙන් වකුගඩු රෝගීන් හමුවට වර්තමානය එලෙස ප්‍රදේශයකට සීමා කිරීමක් කළ නොහැක. බොහෝ වකුගඩු රෝගීන් විවිධ ප්‍රදේශවලින් හමු වේ. ස්ත්‍රී පාර්ශවයට වඩා පුරුෂ පාර්ශවයට වකුගඩු අවදානම වැඩි බව බොහෝ අවස්ථාවල  ඔබ අසා ඇති. නමුත්  එය සත්‍යයක් නොවේ.මෙම රෝගීන් ගේ දැනුම වර්ධනය කිරීම මෙන්ම රාජ්‍ය පාලකයන්ගේ අවධානය මේ වෙනුවෙන් යොමු කරවා ගැනීම මේ වකුගඩු දිනය සැමරීම තුළින් අපේක්ෂා කරන තවත් එක් කාරණයකි. වකුගඩු දුර්වල වීම ඇරඹුණු විට එම රෝගීන් සඳහා විකල්ප දෙකක් පමණක් ඉතිරි වේ. එනම් වකුගඩුවක් බද්ධ කිරීම හෝ රුධිරය අස්කර නැවත ලබාදීම එම පිළියම් දෙක වේ . ගැළපෙන වකුගඩුවක් සොයා ගැනීම බෙහෙවින් දුෂ්කර කරුණක් වන අතර දෙවැනි කරුණ වන රුධිරය අස්කර නැවත ලබා දීම හෙවත් ඩයලයිසිස් කිරීම සතියකට දෙවරක් සිදු කළ යුතු ය. ශ්‍රී ලංකාව වැනි සංවර්ධනය නොවූ රටක ආර්ථික අතින් හෙම්බත් වන ජනතාවට ඩයලයිසිස් කිරීම වැනි මිල අධික ප්‍රතිකාරයන් සිදු කිරීම කළ නොහැක්කකි. මෙම ප්‍රතිකාර සිදු කිරීමට නොහැකි තැන මරණය වැළඳ ගැනීමට ඔවුන්ට සිදුවීම් අතිශය ඛේදජනක  කරුණකි.

            ශ්‍රී ලංකාවේ මෙම වකුගඩු රෝගීන්ට ඇති එකම පිළිසරණ පිළිබඳ ඔබ දැනුවත්ද? ඒ සමස්ත ලංකා වකුගඩු රෝගීන්ගේ සංගමයයි. විශේෂඥ වෛද්‍ය සංජය හෙයියන්තුඩුව මහතා එහි මූලිකත්වය ගෙන ක්‍රියා  කරයි . සමස්ත ලංකා වකුගඩු රෝගීන්ගේ සංගමය යනු  වකුගඩු රෝගීන්, වෛද්‍යවරුන් මෙන්ම කලාකරුවන් හා නොයෙක් ආගමික නායකයන් එක්ව ගොඩනගන ලද සංවිධානයකි. මෙම සංවිධානයේ අරමුණ බවට පත්වී ඇත්තේ රට තුළ වකුගඩු රෝග හා බැඳුණු සෞඛ්‍ය හා සමාජ ආර්ථික ප්‍රශ්න අවම කිරීම වේ.

    වසංගතයක් මෙන් මුළු මහත් රට පුරාම ව්‍යාප්ත වෙමින් යන වකුගඩු රෝගයට පිළියමක් ලෙස ප්‍රථම වකුගඩු බද්ධ කිරීම සිදුකරන ලද්දේ මහාචාර්ය රිස්වි ෂෙරීෆ්, මහාචාර්ය ඒ. එච්  ෆෙරිෆ්ඩින්  සහ මහාචාර්ය ජී.වී ජයසේකර යන උත්තම මනුෂ්‍යත්වය කැපකිරීමෙනි එයට සමගාමීව 1985 වර්ෂයේදී ශ්‍රී ලංකාවේ ප්‍රථම වකුගඩු රෝගීන්ගේ සංගමය බිහි විය. කලක්  අක්‍රියව පැවති නමුදු නැවතත් 2011 ජූනි පස්වන දා සිට සමස්ත ලංකා වකුගඩු රෝගීන්ගේ සංගමය විසින් යළි ස්ථාපිත විය.ජීවිතයත් මරණයත් අතර කල් ගෙවන රෝගීන් ගේ හදවත් නිවාලන්නටත් දැනුම ලබා දෙන්නටත් මේ සමස්ත ලංකා වකුගඩු රෝගීන්ගේ සංගමය, කාර්ය මණ්ඩලය සිය දායකත්වය ලබා දෙන්නේ හෘදයාංගම කැපවීමෙනි. වාර්ෂිකව මිලියනයකට අධික පිරිසක් මරු වැළඳ ගන්නා මෙම රෝගය පිළිබඳව දැනුම්වත් කිරීම්වලට අමතරව ඩයලයිසිස් ප්‍රතිකාර සඳහා පහසුකම් ලබාදීම, වකුගඩු රෝගීන්ට වියළි සලාක ලබා දීම එමෙන්ම අවශ්‍ය ඖෂධ වර්ග ලබාදීම වකුගඩු රෝගීන්ගේ දරුදැරියන්ට ශිෂ්‍යත්ව ප්‍රදානය ආදී උතුම් ක්‍රියාවන් රාශියක් මෙම සංගමය හරහා සිදු කරයි. එමෙන්ම වකුගඩුව නමින් වෛද්‍ය විද්‍යා පුවත්පතක් එළි දැක්වීම, රෝගීන් පිළිබඳ දැනුම්වත් කරමින් භාෂා තුනෙන්ම පොත් දහතුනක් මුද්‍රණය කිරීම, වකුගඩු රෝගීන්ට හැඳුනුම්පතක් නිකුත් කිරීම, වාර්ෂිකව වකුගඩු කැලැන්ඩරයක් නිර්මාණය කිරීම මෙන්ම රෝගීන් මිය ගිය විට අවමංගල්‍ය කටයුතු සඳහා උපකාර කිරීම මෙම වකුගඩු රෝගීන් ගේ සංගමය තවත් වටිනා සත් ක්‍රියාවන් වේ. ශ්‍රී ලංකාවේ පැරණිතම වකුගඩු රෝගීන්ගේ සංගමය හා එක්ව ඔබටත් සහයෝගයන් ලබා දීමේ අවස්ථාව හිමි වී තිබේ. එලෙස දායකත්වය ලබාදීමට සුපින්වත් ඔබට හැකිනම් එය ජීවිතේ ඔබ කරන මහාර්ඝ කුසල කර්මයක් වනු ඇත. සියලු වකුගඩු  රෝගීහු  කායිකවත් මානසිකවත් සුවය  ලබත්වා!

                                                                                   

mathaka pitu